السلام عليكم ورحمة الله وبركاتة
اهلا بيكم فى مدونة حول العالم
وقتى مع طفلى
1_ أول ما تصحي من النوم طبعا زن وقرف وماما عاوز وماما خلصت تعالي شطفيني 😂 حضرتك بقي هتقومي زي الشاطره تشغلي سورة البقره وتفتحي الشبابيك وتعملي فنجان القهوة ولا الشاى وسيبهم يزنوا مش مهم المهم تشربيه إن شاء الله ف الحمام 😅
٢_ هتطلعي طبعا تلاقيهم أكلوا بعض إعملي نفسك مش شايفه آه والله أصلها مرحله ولازم هتعدي وادخلي حضري لهم الفطار وفطريهم وبعد ما يفطروا هتجيبي ملايه مش عوزاها أو حافظه سجاد بس الملايه أسهل وحلتين علي كام معلقه وكراسة قديمه ولا كتاب وافردي وسيبيهم بقي ف الاوضه يخبطوا يطبلوا يقطعوا الورق المهم إنه علي الملايه
3_ سيبيهم واطلعي شوفي إللي وراكي واعملي بينهم مسابقه مين إللي هيلم الاوضه أسرع وطبعا له مكافئه
4_ بابا جيه و اتغدي ودخل يريح اقعدي معاهم بقي ف الاوضه وقولي لهم يعملوا لك مساج لرجليك واستمتعي باحلي تفعيص
5 _بابا صحي وشرب الشاي وقاعدين صويت وزعيق سيبيهم و لو مش عارفه سيبي لهم الاوضه 😉😉
٦_ إختاري بقي أي هوايه لازم تعمليها إنا عن نفسي بحب الكروشيه و بابجي فا يا بلعب جيم يا بعمل أي حاجه كروشيه وهما عمالين يصوتوا عادي آه أهم حاجه تبقي عامله حسابك ف شكولاته ف الفريزر علشان ترفع لك هرمون السعاده لما يناموا
جيه وقت النوم لو ولادك بيناموا لوحدهم خير وبركه لو لازم تنيميهم يبقي تعملي الاتي الانوار كلها تطفي ومفيش كلمه ماما عاوز أشرب ماما أنا جعان ماما اللولو هينقط لا خلاص خدتي القرار نفذيه يوم والتاني والتالت ويعرفوا إن خلاص ده ميعاد النوم
بعد ما يناموا قومي بقي شوفي نفسك ب كوبايه نسكافيه بكتاب بشيكولاته المهم تبقي عارفه إن ده حقك طبعا في ناس متقدرش تعمل كده وانا نفسي ساعات كتير مش بعمل ده بس ده حقك يا أما هنموت مقهورين علي شبابنا إللي راح ف المواعين 😭😭
إرسال تعليق